- Шыршаның жаны шаттыққа толды
Бүгін жылдағы дәстүр бойынша Жаңа жыл мерекесіне орай Жәнібек ауданы әкімі Мұрат Мұқаевтың қатысуымен оздырған мерекелік кеште аудандағы әлеуметтік аз қамтылған, көп балалы отбасылардан және үздік оқитындар қатарынан шыққан мектеп оқушылары шат-шадыман боп өнер көрсетті. Елбасы құттықтауы арқау болған бейнекөріністен соң, аудан басшысы жыл жетістіктерін ортаға салып, барша жасөспірімге оқуда озат, мінезде орнықты бола білу керектігін айтты, ақжарма тілегімен бөлісті. Кейін балаларға шыршаның безендірілімі алуан түске боялып, сәулемен жарқ-жұрқ етуіне септесті.
Өнерпаз оқушылардан Айшат Хамзина (Т.Жароков атындағы мектеп), «Сәлем, саған, туған ел», Саламат Жанболат (Ғ.Қараш атындағы мектеп) «Шыршаның жыры», Аманжол Темірболат (А.Оразбаева атындағы мектеп) «Жаса, Қазақстан» әндерін шырқаса, басқа да білім ордаларынан бишілер тобы орындаған «Үнді», «Ұйғыр», «Шопан ата» билері сәтті шықты. Ертегі кейіпкерлері қатысқан қойылымдар көңілді болды. Аяз ата мен Ақшақар өрендер өнерін демеп отырды. Кеш соңында мерекелік киім киген мектеп басшылары мен оқушылар сән-салтанатымен көпшілікке таныстырылды. Аудан әкімі Мұрат Мұқаев балаларға сый-сияпатын үлестірді.
Арайлым КЕСЕКОВА
https://www.facebook.com/home.php
